Fasnacht 2024
Fyr uns isch klar, dä Fischergalge g’heert ins UNESCO-Inventar
Laufsch am Rhy durab oder duruff
falle s aim immer wieder uff,
die charaggteristische Hyysli, wo s Rhybord dien ziere
gseesch uff baide Syte, wenn dert gosch go spaziere.
Was e jede Bebby grad verstoot,
dass es um d Basler Fisschergalge goot.
Fäne Hyysli sott me allewyyl Beachtig schängge,
denn uss em Basler Stadtbild sind die nimmi wägg z dängge.
Scho im Mittelalter, so duet me brichte,
hett me uff s Galgefische nit kenne verzichte.
Dr Fischfang hett sich dertsmool so fescht glohnt,
dass s Glaihyynige fascht numme Fischer hän gwohnt.
Mit eme grosse Galge und eme Netz – s isch nit glooge,
hett me syynerzyt d Fisch uss em Rhy use zooge.
Doormit dr Fischer nit im Rääge muess stoo,
hett sone Galge, no dis no,
e Hyysli drum umme baut biko.
Die Hittli uff Stelze, hoch iiberem Rhy,
sin immer no do, und so solls au syy.
Das dännge nit alli, s isch druurig aber woor,
denn d Basler Regierig hett eppis anders vor.
Sy blaane d Uferböschig z saniere,
und das soll jetz zue folgendem fiere:
D Fischergalge mien wägg, elf Stigg an dr Zaal.
Mir sind entsetzt, das isch fatal!
Sy saage, die Galge hän ihri frieneri Funggtion verloore.
Das stimmt so nid – dääne gheert ains and Oore.
Dass sy nimmi brucht wärde, isch absolute Mischt.
S wird allewyyl no mit dääne Galge gfischt.
Nadiirlig läbt me z Basel nimmi vom Fische,
aber d Woored darf me nit undere Deppig wische.
Wurd me die Hyysli abrisse, wär das e Hohn,
und Basel verliert wider e Stigg Draditioon.
Scheen isch aber, de glaubsch es nid,
s glingt de Basler Galgefischer e riise Schritt.
Ganz offe und ohni uff d Barrikaade z stiige,
hän sy s Bundesamt fir Kultur kenne iiberzyyge,
d Galgefischerei in d Lischte vo de lääbige Draditioone uff z nää.
Wär hätt das dänggt, dass es das no ka gä!
Wenn s Rhyschwimme se gschützti Draditioon soll syy,
isch doch sicher s Galgefische au derbyy,
und klar isch au, s liggt uff em Disch,
dass die Art vom Fische die scheenschti isch.
Denn ohni Hoogge und ohni Mieh,
kame d Fisch schonend uss em Wasser zieh.
S wär wirgglig schaad, wie mit alli finde,
wenn die glaine Hyysli miesste verschwinde.
Die solle deert bliibe, das isch kei Gfaasel,
sy sin e wichtige Teil vo Basel.
Dumm sin mir dr Mainig, zem die Hyysli z schütze,
wurd numme no ai Sach nütze:
Alli Fischerhyysli sin scho gly
im UNESCO-Inventar derby!
